Ministrja për Evropën dhe Punët e Jashtme, Elisa Spiropali, ka shprehur mbështetje të plotë për veprimet e administratës amerikane të Presidentit Donald Trump kundër regjimit në Venezuelë.
Në deklaratën e saj, Spiropali theksoi se Shqipëria qëndron përkrah lidershipit të Sekretarit të Shtetit Marco Rubio në luftën kundër autoritarizmit dhe rrjeteve kriminale.
Ministrja nënvizoi të drejtën e popullit venezuelian për demokraci dhe sundim të ligjit, duke kërkuar që bashkësia ndërkombëtare të mos mbetet indiferente ndaj shtypjes.
Si aleate e NATO-s, Shqipëria riafirmon angazhimin e saj pranë Shteteve të Bashkuara në mbrojtje të vlerave demokratike dhe sigurisë globale.
Postimi i plotë:
“Shqipëria qëndron pa mëdyshje përkrah Shteteve të Bashkuara dhe Presidentit të SHBA-së, Donald Trump, në veprimet e tyre vendimtare kundër regjimit narko-terrorist të Venezuelës.
Ne mbështesim lidershipin e fortë të Sekretarit të Shtetit Marco Rubio në përballjen me autoritarizmin, korrupsionin dhe rrjetet kriminale transnacionale.
Populli venezuelian ka një të drejtë të pamohueshme për liri, demokraci dhe sundim të ligjit dhe bashkësia ndërkombëtare nuk duhet të heshtë përballë shtypjes dhe frikës.
Si një aleat i palëkundur i SHBA-së dhe anëtar i NATO-s, Shqipëria qëndron krah për krah me lidershipin amerikan në mbrojtje të parimeve demokratike dhe sigurisë globale.“