Vritet shefi i inteligjencës së Gardës Revolucionare Iraniane

Gjeneral-major Majid Khademi, njëri ndër figurat më të fuqishme të aparatit të inteligjencës iraniane, ka humbur jetën në orët e para të mëngjesit gjatë një sulmi ajror të kryer nga forcat amerikane dhe izraelite mbi territorin e Iranit. Lajmi u konfirmua nga mediat zyrtare shtetërore iraniane.

Khademi mbante pozitën e kreut të Organizatës së Mbrojtjes së Inteligjencës dhe ishte figurë qendrore brenda Korpusit të Gardës Revolucionare Islamike (IRGC), institucioni ushtarak e i sigurisë që konsiderohet shtylla kurrizore e pushtetit të Teheranit.

Garda Revolucionare e cilësoi menjëherë sulmin si akt i hapur agresioni ndaj sovranitetit iranian dhe lajmëroi se do të ndërmarrë hapa konkrete hakmarrjeje, pa specifikuar natyrën e tyre. Detajet lidhur me ceremoninë e varrimit do të bëhen të njohura në ditët në vijim, sipas njoftimit zyrtar.

Nga Uashingtoni dhe Tel Avivi nuk ka ardhur asnjë reagim publik deri në momentin e publikimit të këtij materiali.

Ekspertët e çështjeve të sigurisë rajonale, të cituar nga disa media ndërkombëtare, vlerësojnë se ky incident mund të shërbejë si pikë kthese e rrezikshme, duke e shtyrë rajonin drejt një cikli të ri përshkallëzimi. Marrëdhëniet midis Iranit dhe Izraelit kanë qenë prej kohësh në kufijtë e konfrontimit të hapur, me sulme reciproke ndaj infrastrukturave ushtarake dhe vrasje selektive të zyrtarëve të lartë.

Autoritetet iraniane e vlerësojnë eliminimin e Khademit si humbje të rëndësishme strategjike dhe theksojnë se ai luante rol të shumë të rëndësishëm në koordinimin e operacioneve të inteligjencës. Teherani e ka etiketuar ngjarjen si “sulm të koordinuar ndërkombëtar” dhe paralajmëron se nuk do të mbetet pa përgjigje.